Ministri Ismajli premton mbështetje financiare për spitalin e Gjilanit

Gjilani

Ministri Ismajli premton mbështetje financiare për spitalin e Gjilanit

Më: 28 prill 2018 Në ora: 17:34
Ministri Ismajli premton mbështetje financiare për spitalin e Gjilanit

Ministri i Shëndetësisë, Uran Ismajli gjatë ditës sot ka vizituar spitalin rajonal të Gjilanit, me ç ‘rast ka premtuar mbështetje për rregullimin e infrastrukturës mjekësore në këtë spital.

Ministri i Shëndetësisë, Uran Ismajli tha se qëllimi i kësaj vizite është të njoftohet me kërkesat dhe nevojat e këtij spitali. Ismajli po ashtu tha se ndër kërkesat thelbësorë të stafit mjekësor ndaj tij ishte ndërtimi i një qendre emergjente.

Ismajli: do të ofrojë mbështetje që të përmirësohet gjendja e spitalit në Gjilan

"Kishim ca kërkesa nga vetë mjekët e ndryshëm apo punëtorët shëndetësor qe të rinovohet apo të ndërtohet një qendër e re emergjente në Gjilan, e cila realisht sot nuk i ka kushtet që duhet t'i ketë. Ka një infrastrukturë dhe shtretër të dëmtuar që nuk i plotësojnë kushtet që duhet të jenë dhe ofrojnë një dukje jo të mirë të shëndetësisë kosovare....unë do t'iu ofroj mbështetje dhe buxhet për të parë një situatë dhe pamje tjetër në spitalin e Gjilanit", u shpreh Ismajli.

Ismajli po ashtu tha se do të investojnë si në personel mjekësor ashtu edhe në infrastrukturë.

Kurse, drejtori i përgjithshëm i spitalit të Gjilanit, Nisret Hajrullahu duke falënderuar ministrin Uran Ismajli për vizitën tha se mbetën të përkushtuar për të ofruar shërbime sa me cilësore për pacientët gjilanas.

Hajrullahu tha se nga ministri Ismajli kanë kërkuar mbështetje për ndërtimin e qendrës emergjente, materialin shpenzues dhe barnat.

Hajrullahu: Kemi nevojë për një qendër emergjente

"Sot kemi kërkuar ndoshta shumë, por ka qenë takimi i parë i joni por një nevojë më emergjente po e quaj për ndërtimin e një qendre urgjente diagnostike, furnizimi me aparaturë, me shtretër, me material hargjues, barna, besoj që gradualisht edhe ministri do të na përkrahë edhe me projekte edhe me punësim, edhe në të gjitha aspektet që çalojmë apo kemi nevojë ne si spital", u shpreh Hajrullahu.

Ministri i Shëndetësisë, Uran Ismajli i pyetur për gjendjen e 60 mjekëve të  cilët kanë mbetur të papunë për shkak të mos vazhdimit të kontratës me Karitasin, ai tha se çalime në këtë proces ka pasur qysh në fillim, derisa nuk është ditur se çka do të ndodh pas periudhës dy vjeçare me këta punëtor.

Ismajli: Ka pasur ngecje

"Realisht ajo kur është bërë është bërë me një afat të caktuar nuk është menduar se çka do të ndodh me ata punëtor, natyrisht që ka qenë mirë që është ofruar një shërbim, por një çalim i këtijt procesi ka qenë se nuk është treguar se çfarë do të ndodh me këta punëtor", tha ai.

Aktualisht në Qendrën Emergjente të Spitalit të Gjilanit ka mungesë e çarçafëve, materialit hargjues, barnave esenciale.

commentFirst article
Sot mund të lexoni Shfletoni kopertinat