Para fillimit të vitit të ri shkollor, kryetari i Komunës së Gjilanit, Lutfi Haziri, është takuar me drejtorët e shkollave të Komunës së Gjilanit, të cilët i ka falënderuar për angazhimin e deritanishëm nëpër shkolla dhe ka kërkuar që të jenë, “zot shtëpie” të suksesshëm.
“Në emër të të gjithë drejtorëve të shkollave fillimisht falënderoj drejtorin e deritanishëm të arsimit, Nazmi Musa, i cili ka punuar së bashku me ju, për ngritjen, zhvillimin, mbështetjen dhe cilësinë në arsimin e Gjilanit. Ai është liruar nga detyra e drejtorit, për shkak të pensionimit dhe i dëshirojmë shëndet gjatë jetës në vazhdim. Ka qenë i përkushtuar, por edhe i vendosur për të mirën e arsimit të Gjilanit”, ka thënë Haziri.
Lidhur me fillimin e vitit të ri shkollor, kryetari i ka uruar të gjithë mësimdhënësit, nxënësit dhe prindërit, duke i garantuar se fusha e arsimit është prioritet i veçantë i qeverisjes së udhëhequr nga ai.
“Në këtë mbledhje të përbashkët, qëllim kryesor është t’u uroj për vitin e ri shkollor, duke ju garantuar mbështetje të vazhdueshme në rrugëtimin tonë menaxhues me institucionet shkollore dhe arsimin në përgjithësi si proces në Gjilan”.