Athletic Bilbao dhe Real Madrid kanë ndarë pikët në takimin që u zhvillua në kuadër të xhiros së katërt në La Liga, duke luajtur me rezultatin 1:1.
Skuadra e Lopeteguit, ashtu edhe siç pritej, ishte diçka më kërkuese duke mbajtur topin nën kontroll dhe duke krijuar raste.
Bilbao në anën tjetër ishte skuadra e cila ishte në pritje të gabimit më të vogël nga kundërshtari dhe e gatshme për të ndëshkuar.
Këtë e dëshmoi në minutën e 32’ kur me anë të Muniain realizoi golin e epërsisë, për të befasuar “mbretërit”.
Pjesa e parë përfundoi me rezultatin 1:0 në favor të baskëve.
Pjesa e dytë ishte edhe më atraktive, me një Real edhe më kërkues, e me një Bilbao që nuk harronte të kërcënonte.
Ishte zëvendësimi i Isco që bëri diferencën. Vetëm tre minuta pas inkuadrimit ai realizoi golin e barazimit (63’).
Me këtë barazim, madrilenët mbeten një hap prapa Barcelonës, kurse Bilbao grumbullon pikën e pestë.