Ylli i “Arsenalit”, Mesut Ozil do të mungojë në ‘nxehjen’ finale përpara fillimit të ndeshjes zyrtare të Botërorit, për shkak të një dëmtimi në gju, por pjesëmarrja në Kupën e Botës nuk vihet në diskutim, sipas Federatës Gjermane të Futbollit (DFB).
29 vjeçari, Ozil për shkak të dhimbjeve të lehta në gjurin e tij të djathtë, do të qëndrojë në tribunë në miqësoren që përfaqësuesja gjermane do të luajë kundër Arabisë Saudite, e cila do të zhvillohet në “Leverkusen”.
“Nuk mora pjesë në stërvitjen e fundit të skuadrës sot, por disa ushtrime vrapuese ishin të mundura sërish”, shkroi ai në rrjetin social “Twitter”.
Mesfushori, i cili u dëmtua të shtunën e kaluar në humbjen shokuese 2 me 1 kundër Austrisë, nuk ka marrë pjesë në stërvitjet e plota në katër ditët e fundit në qendrën stërvitore të Gjermanisë në Epann, në Italinë veriore.
“Nuk është asgjë dramatike, ne thjesht nuk duam të ndërmarrim asnjë risk dhe ai ishte i aftë që të vraponte në stërvitje.
Besoj se ai do të jetë gati për Kupën e Botës”, – tha drejtori i ekipit të Gjermanisë, Oliver Bierhof.
Ozil i cili përfundoi sezonin futbollistik 2017/2018 me një dëmtim në shpinë, është në përpjekje për të rikuperuar dëmtimin e tij për ndeshjen e parë të Kupës së Botës kundër ekipit të Meksikës në Moskë, në datën 17 qershor.
Në rast se Ozil do të mungojë, ai do të zëvendësohet nga mesfushori i “PSG”-së, Juljan Draksler, i cili do t’i bashkëngjitet repartit të avancuar.
