Ndeshja miqësore Kosovë-Shqipëri do të luhet në shtetin e Zvicrës përkatësisht nesër në orën 20.00 në stadiumin “Letzigrund” në Zurich.
Analisti i futbollit, Genc Sermaxhaj, tha se është një ndeshje emocionuese. “Takimi Shqipëri - Kosovë është mirëseardhur për të dyja kombëtaret sepse kanë mundësi t’i shohin nga afër futbollistët e ftuar dhe formën e tyre aktuale.
Ajo çfarë ka bërë trajneri Challandes, është për t’u vlerësuar ngase ka ftuar disa futbollistë të kombëtares U21, të cilët në ndeshjet e tyre eliminatore treguan formë të mirë dhe me të drejtë janë ftuar nga trajneri i kombëtares. Gjithashtu edhe trajneri i kombëtares së Shqipërisë Panucci, ka mundësi t’i shohë futbollistët e ftuar dhe formën e tyre.
Rezultati për ne shqiptarët e Kosovës dhe Shqipërisë, nuk ka rëndësi aq të madhe sa ka rëndësi ndeshja e mirë e atraktive, të ketë gola e raste të mira shënimi, të aplikojnë lojën që kërkojnë trajnerët, prandaj rezultati në këtë ndeshje ‘vëllazërore’, është në plan të dytë”, thotë Sermaxhaj për gazetën kombëtare “Bota sot”.
