Reprezentuesi i Shqipërisë, ferizajasi Ylber Ramadani, është shumë afër suksesit të madh me klubin Vejle, që të ngjiten në elitën e futbollit të Danimarkës. Vejle udhëheq kreun me 50 pikë pas 28 jave, një më shumë se Esbjerg, dy se Viborg dhe Vendsyssel. Është një kampionat shumë i fortë, me rivalitet të madh për kreun e tabelës, më së miri e dëshmon edhe diferenca e ngushtë e pikëve mes vendit të parë dhe të katërt.
Futbollisti nga Kosova është optimist se me Vejlen do ta arrijnë qëllimin, ta ruajnë pozitën e parë në pesë javë sa kanë mbetur deri në përfundim të edicionit. Mesfushori është në formë të mirë dhe beson se do të kthehen të pamposhtur nga sfida e fundjavës (me 28 prill, 15.30), në përballje me Viborg-un, në ndeshjen derbi. Ramadani tha se kushtet janë të mira dhe ekipin e tij e sheh më të organizuar se të gjithë pretendentët tjerë.
“Bota sot”: Vejle është shumë afër elitës së futbollit danez s, si i sheh ndeshjet e fundit?
Ylber Ramadani: Shumë mirë jemi me rezultate, jemi shumë afër qëllimit, por duhet të jemi me këmbë në tokë sepse kemi edhe pesë ndeshje deri në fund.
“Bota sot”: Sa jeni i kënaqur me kushtet dhe atmosferën në ekip, si dhe me përkrahjen e tifozëve?
Ylber Ramadani: Jemi të kënaqur me kushtet dhe atmosfera tani në ekip është shumë e mirë. Ekipi përkrahet shumë nga tifozët, të cilët janë edhe lojtari i 12-të i yni.
“Bota sot”: Me 28 prill ndeshja kryesore në fushë të Viborg-ut, a shpresoni në fitore apo edhe me një pikë jeni të kënaqur?
Ylber Ramadani: Ne normalisht në çdo ndeshje hyjmë për fitore, por rezultatin e din vetëm Zoti, e jona është të japim maksimumin dhe të mundohem t’i nxjerrim pikët e plota, në luftë për ta ruajtur kreun e tabelës.
“Bota sot”: Esbjerg, Viborg dhe Vendsyssel, cili është rivali më i madh nga këto skuadra në luftë për vendin e parë?
Ylber Ramadani: Të tria ekipet janë rival i yni. Pavarësisht kësaj, ne do të bëjmë më të mirën dhe të jemi në elitë.
“Bota sot”: Çfarë e dallon më shumë Vejlen nga ekipet tjera?
Ylber Ramadani: Vejle nga ekipe tjera dallon si për nga ana e organizimit po ashtu edhe jemi ekip më kompakte. Më së miri e dëshmojnë edhe rezultatet e deritashme.
“Bota sot”: Sa është vështirë të jetohet në Danimarkë, është një jetë më ndryshe, më e mirë se në Kosovë për nga kushtet?
Ylber Ramadani: Po, normalisht se është më ndryshe dhe normalisht është pak më vështirë, por jam përshtatur mirë. Gjërat shkojnë sipas planit, e imja është të jap maksimumin.
“Bota sot”: Ylber Ramadani është edhe në kombëtaren A të Shqipërisë, a mendoni se do të jetë vit shpërthyes në fanellën e kuqezinjve nën drejtimin e selektorit Christian Panucci?
Ylber Ramadani: Kësmet, me emër të Zotit besoj shumë që do të jetë vit i mbarë për mu. Besoj që do të ia dal dhe të bëjë më të mirën për kombëtaren e Shqipërisë.