Tri pikë larg titullit, Skënderbeu synon ta festojë përballë Kukësit këtë të dielë, pesë javë para përfundimit të kampionatit, titulli i 8-të do të vijë, edhe nëse nuk fitohet në raundin e radhës ndaj Kukësit, megjithatë, përtej rekordeve për tu thyer për Skënderbeun, e në veçanti Ilir Dajën një festë ndaj Kukësit ka simbolikë të veçantë.
Nuk bëhet fjalë thjesht për takimin ideal të dorëzimit të stafetave nga kampionët në fuqi te kampionët e ardhshëm, por pikërisht te ajo finale e sezonit të kaluar, kur festonte Kukësi. Fitonte 2-0 një ndeshje të destinuar për të gjeneruar shumë polemika për vendimet e Enea Jorgjit dhe kartonin e kuq në duart e Hamdi Salihit që kthehej në një imazh ikonik të finales. Me shumë mundësi, pikërisht nga ajo ndeshje lindte dhe titulli i këtij viti për Skënderbeun. Ilir Daja kishte marrë drejtimin e skuadrës në janar duke zëvendësuar Agostinellin, bëri gjithçka mirë me një mesatare të frikshme pikësh por ishte i detyruar të ndiqte, një detaj jo i vogël dhe pikërisht në ndeshjen vendimtare kuptoi se ishte ky faktor që e kishte penalizuar. Në një ndeshje mund të ndodhë gjithçka, vitin tjetër duhet të kryesojmë që nga fillimi për të mos e lënë në duart e një 90- minutëshi.
Dhe në fakt ashtu ndodhi, ky sezon ishte dëshmia e një dominimi nga fillimi në fund për skuadrën korçare, e aftë për të dominuar ndaj çdo rivali e madje duke mos lejuar të preket edhe nga çështjet e mprehta me UEFA-n. Këtë fundjavë, Ilir Daja ka në dorë match pointin e titullit, i duhet një fitore për të festuar, një titull vendosmëria për të cilin ka lindur ndoshta pikërisht nga ajo finale e vitit të kaluar me Kukësin.
