Mitchy Batshuayi pohon se ka qenë subjekt i thirrjeve raciste mbrëmë gjatë ndeshjes kthyese të 1/16 së finales të Evropa Ligës mes Borussia Dortmundit dhe Atalantës.
Ai ka zgjedhur rrjetin social Twitter për t’i kritikuar tifozët e përfshirë në thirrjet raciste ndaj tij.
Dortmundi kaloi në rrethin tjetër të garave pas barazimit 1-1, i cili ishte i mjaftueshëm për klubin e Bundesligës që ta eliminonte Atalantën e Etrit Berishës.
Por, kualifikimi tutje, sado i rëndësishëm, ka lënë përvojë të keqe në kujtesën 24-vjeçarit, pasi tifozët e klubit italian lëshuan zëra majmunesh në drejtim të sulmuesit belg gjatë gjithë ndeshjes.
E Batshuayi, i cili është i huazuar te Dortmundi nga Chelsea, ka reaguar në Twitter.
“Viti 2018 dhe ende zëra raciste majmunesh në tribuna... vërtet?! Shpresojnë se do të kënaqeni duke e shikuar në TV pjesën e mbetur të Evropa Ligës, derisa ne kaluam në rrethin tjetër. Thuaji jo racizmit. Shkoni dhe shikojeni Black Pantherin”, shkroi ai në Twitter.
