Punimeve në Stadiumin e Prishtinës nuk po u vije fundi. Aty tash kanë dalë edhe disa ndërhyrje të paparapara dhe që po i kushtojnë shtetit miliona euro.
Ministria e Kulturës, Rinisë dhe Sportit, ka dhënë një tender në vlere të hiç më pak se 4 milionë e 471 mijë eurove për t’i përfunduar disa punë që nuk janë paraparë më herët.
“Punët e pa parapara me projektin kryesor si dhe me kontratën për Renovimin e Stadiumit të Qytetit në Prishtinë, pozicione të Kategorisë së IV-të të Stadiumeve – Rregullorja e UEFA-së të kërkuara domosdoshmërish për tu licencuar nga UEFA/FIFA”, thuhet në njoftimin për tender të shpallur në KRPP.
Aty është treguar po ashtu se fitues i këtij tenderi është shpallur kompania “AL TRADE”SH.P.K.
Këtë tender kjo kompani e ka fituar pa pasur fare konkurrencë, pasi në këtë njoftim tregohet se numri i kompanive konkurruese ishte vetëm një.
Kontrata mes kompanisë fituese dhe Ministrisë së Kulturës është nënshkruar më 13/02/2018.
