Një Levante në vështirësi do të presë Real Madrid në javën e 22-të të kampionatit spanjoll me synimin për t’u bërë ekipi i pestë që mposht Real Madrid në këtë sezon të La Liga-s. Rikthimi në kategorinë kryesore të futbollit spanjoll nuk ka qenë aspak i mirë për vendasit. Ata, në fakt, mbajnë vendin e gjashtëmbëdhjetë në renditje, vetëm dy pikë larg zonës së rënies nga kategoria dhe nuk kanë marrë asnjë fitore në nëntë ndeshjet e fundit të kampionati, duke grumbulluar vetëm 4 pikë nga këto takime (4 barazime, 5 humbje). Lojtarët e Juan Ramon Lopez do të paraqiten në takimin e sotëm pas barazimit 2-2 të marrë në minutat e fundit të ndeshjes së luajtur në fushën e Deportiva La Coruna fundjavën e kaluar.
Ndërkohë, për sa i takon Real Madrid, edhe pse kanë mbetur tre muaj e gjysmë deri në fundin e kampionatit, skuadra e Zidane ka dalë jashtë luftës për të mbrojtur titullin e fituar sezonin e kaluar. Madrilenët janë 19 pikë larg Barcelona-s kryesuese, por kanë një ndeshje më pak. Për këtë arsye, vëmendja e tyre është përqendruar te sigurimi i një vendi mes katër të parëve në renditje. Gjithsesi, “Los Blancos” duket se kanë gjetur rrugën e duhur në dy ndeshjet e fundit të kampionatit, në të cilat kanë realizuar 11 gola dhe kanë pësuar vetëm dy (7-1 kundër Deportivo-s dhe 4-1 kundër Valencia-s). Të shtunën në mbrëmje duhet të vijë edhe fitorja e tretë radhazi në La Liga, duke parë se Real ka fituar 9 nga 11 ndeshjet e fundit të kampionatit që ka luajtur në fushën e Levante (9 fitore, 1 barazim, 1 humbje), me humbjen e tyre të vetme që ka ardhur në shtatorin e 2011-ës.
Kërcënimi numër një i vendasve do të jetë Cristiano Ronaldo, i cili ka realizuar 14 gola (11 në La Liga) në 13 ndeshjet e luajtura kundër tyre në të gjitha kompeticionet. Një tjetër protagonist i këtij takimi pritet të jetë sulmuesi shqiptar Armando Sadiku, i cili është transferuar në merkaton e janarit te Levante. Një statistikë interesante është ajo që tregon se Levante është skuadra që ka regjistruar më shumë barazime në këtë sezon të La Liga-s, me 10 të tillë. Real Madrid, nga ana tjetër, është skuadra që ka bërë më shumë gjuajtje drejt portës, në këtë kampionat, por vetëm 146 prej këtyre tentativave kanë përfunduar në kuadrat.