Modeli i futbollit gjerman ka rezultuar ndër më të suksesshmit në Europë me aftësinë e tij për të tejkaluar krizat financiare, falë impianteve të mbushura plot e përplot, që i kanë dhënë futbollit një tjetër vlerë e kuptim. Një sistem futbolli që është reflektuar në rezultate, sidomos në Kombëtaren e Gjermanisë, që shkon në “Rusi 2018” si kampionia në fuqi e Botërorit.
Mirëpo në këtë sezon klubet gjermane nuk po paraqiten në nivelin e kërkuar në Kupat e Europës. Koha kur në finalen e Championsit ishin dy skuadra të Bundesligës duket shumë e largët. Këtë sezon gjermanët rrezikojnë të zgjohen nga “gjumi letargjik” me vetëm dy ekipe që i përfaqësojnë në skenat europiane. Në skenarin më të keq, parashikohet që Bayerni të vazhdojnë në Champions dhe Leipzigu në Europa League. Gjithsesi, shpresat e Dortmundit nuk kanë marrë ende fund, ashtu siç ka ende rasti i Kolnit në Europa League.
Rreziku është konkret, aq më shumë në Europa League, ku janë eliminuar tashmë Freiburgu, Hoffenheimi dhe Hertha e Berlinit. Kolni me një fitore përballë Crvena Zvezdas mund të sigurojë vendin dytë në grup. Mjaft zhgënjyese situata për Bundesligën, që duhet të tregojë një tjetër fytyrë në Europë.