Agron Selmani, përveç si kryetrajner i KF Ferizajt, është edhe farmacist, por që të dyja shumë herë e stresojnë. “Te dy drejtimet janë të mira, por edhe punë stresuese, nuk është e lehtë. Por nuk jam pishman se i kam zgjedhur këto dy profesione... Farmacia të mundëson të kontaktosh me njerëzit që kanë nevojë apo një këshill farmaceutike, kurse zeja e trajnerit është konstant në kërkim të suksesit dhe atëherë kur kjo mungon je gjithmonë i gjykuar”, tha Selmani. Cila paguhet më shumë? “Pasioni nuk ka çmim nganjëherë, atëherë kur mendon se ia vlen apo paguhet atëherë e sheh se je ende në investime. Farmacia me ka dhënë një marrëdhënie me publikun në një formë tjetër, kurse zeja e trajnerit në një formë pak më ndryshe, të merresh me zejen e trajnerit, pa një profesion dytësor në rrethanat e Kosovës është një rrezik në vetvete”, përgjigjet Selmani. A do ta kishe ndërruar profesionin e farmacistit me trajner? “Mendoj të udhëtojmë bashkë edhe një kohë. Unë kam edhe një farmaci private të cilën e menaxhon bashkëshortja, magjistër i farmacisë dhe në njëfarë mënyrë unë jam i ndarë nga farmacia dhe i jam përkushtuar më shumë zejes se trajnerit mund te quhet largim i planifikuar nga zeja e farmacistit dhe sinonim i farmacisë në familjen time është bashkëshortja, por mund të shtoj edhe këtë, se nuk mund të thuhet se nuk ia kam gjetur ilaçin bashkëpunimit të dy profesioneve”, ka thënë Selmani.
