Jetën e tij ia kushtoi fotografisë, duke u kthyer në njeriun që përjetësoi në polaroid disa prej figurave legjendare të “Rock”-ut botëror. Këtë herë, Mick Rock nuk qëndron para aparatit fotografik.
Janë të tjerët që shkrepin fotot e tij në premierën e filmit biografik kushtuar 69-vjeçarit, “Shot! The Psycho-Spiritual Mantra of Rock” (Shkrepe: Mantra psiko-shpirtërore e Rockut).
Një sërë aktorësh, muzikantësh e artistësh të tjerë e rrethonin në këtë ngjarje fotografin e famshëm britanik, duke nisur nga Juliette Lewis, Billy Idol, Sasha Grey, Kelly Osbourne, Mena Suvari, e deri te Shepard Fairey.
Dokumentari përdor pamje nga vet arkiva e tij për të krijuar historinë e muzikantëve avangardistë, si David Bowie, Queen, Blondie Iggy Pop. Edhe pse filmi rrëfen jetën e tij, vet fotografi Rock nuk ndihet shumë rehat.
“Unë isha kritiku i tij më i madh. Sa herë që shihnim xhirimet, do të nxirrja ndonjë gjë, skenë pas skene, deri sa u lodhën me mua”, tha Mick Rock, fotograf.
Filmi shfaqet në Nju Jork dhe Los Angeles nga data 7 prill e do të jetë i disponueshëm edhe në formatin dixhital.
