Gashi: Policia duhet të vazhdojë punën e pa ndikuar

Ferizaj

Gashi: Policia duhet të vazhdojë punën e pa ndikuar

Më: 10 maj 2018 Në ora: 19:06
Policia e Kosovës

Ministri i Punëve të Brendshme, Bejtush Gashi, i shoqëruar nga ushtruesi i detyrës së drejtorit të Përgjithshëm i Policisë së Kosovës, Naim Rexha, vizituan Drejtorinë Rajonale të Policisë së Kosovës në Ferizaj, ku u priten nga drejtori Gazmend Hoxha.

Me këtë rast, ministri Gashi vlerësoi lartë angazhimin dhe punën që po bëjnë Policia e Kosovës, në ofrimin e sigurisë për qytetarët e vendit.

“Policia e Kosovës duhet të vazhdojë punën e saj pa qenë e ndikuar, e cila sipas mandatit të saj ligjor, është e obliguar të ofrojë rend dhe siguri për të gjithë qytetarët e Kosovës, pa dallim. Ky profesionalizëm i juaji është vlerësuar edhe nga qytetarët dhe nga organizatat që e monitorojnë punën e Policisë”, theksoi ministri Gashi.

Në veçanti, ministri Gashi falënderoi drejtorin e Drejtorisë Rajonale të PK-së në Ferizaj në angazhimin e pakursyer që kanë bërë në gjetjen e trupave të të dy policëve të aksidentuar ditë më parë.

Ndërsa, drejtori Hoxha, e njoftoi ministrin Gashi me situatën e përgjithshme të sigurisë në këtë rajon, duke vlerësuar se situata është e qetë dhe ka një trend të rënieve të veprave kriminale.

Në këtë takim, Hoxha e falënderoi ministrin Gashi për përkrahjen e dhënë në avancimin e mëtejmë të Policisë në rajonin e Ferizajt.

Në fund të kësaj vizite, ministrit Gashi i është bërë një prezantim i historikut të Drejtorisë Rajonale të Policisë së Kosovës në Ferizaj.

commentFirst article
Sot mund të lexoni Shfletoni kopertinat