Brexit, BE pro zgjatjes së periudhës së tranzicionit

Evropë

Brexit, BE pro zgjatjes së periudhës së tranzicionit

Më: 18 tetor 2018 Në ora: 18:30
Theresa May

Bashkimi Evropian tha se është i gatshëm të zgjasë periudhën e tranzicionit pas “Brexit”-it, nëse Britania e Madhe e do këtë.

Periudha aktuale e tranzicionit, që synon të hapë rrugën për marrëdhënien e ardhshme mes Britanisë dhe unionit, është 21 muaj. Por, me të dyja palët që po dështojnë të arrijnë një marrëveshje, kryeministrja britanike, Theresa May ka sugjeruar zgjatjen e kësaj periudhe me disa muaj.

Disa përkrahës të “Brexit”-it në Britani kanë reaguar ashpër ndaj sugjerimit, ndërsa një burim nga BE ka thënë për BBC-në se do të duhet të ketë pasoja financiare, nëse Britania zgjat periudhën e tranzicionit.

Sidoqoftë, presidenti i Këshillit Europian, Donald Tusk foli për gazetarët në fund të samitit të Brukselit, ku nuk u arrit asgjë.

“Nëse Britania e Madhe do një zgjatje të periudhës së tranzicionit, që do të ndihmonte në arritjen e një marrëveshjeje, unë jam i sigurt se udhëheqësit do të ishin të gatshëm ta merrnin në konsideratë këtë”, tha ai.

Jean-Claude Juncker, president i Komisionit Evropian, tha në anën tjetër se zgjatja e periudhës së tranzicionit, sipas gjasave është e paevitueshme dhe është një ide e mirë, sepse do të linte vend për ravijëzimin e një marrëveshjeje afatgjatë mes Britanisë dhe BE-së.

Më herët, May kishte thënë se zgjatja e periudhës së tranzicionit ishte një ide e re, që u shfaq në negociata, dhe nuk e kishte menduar se do të mund të konkretizohej.

commentFirst article
Sot mund të lexoni Shfletoni kopertinat