Kryeministri grek, Aleksis Cipras do të propozojë ngritjen e një komisioni hetimor paraprak në parlament për të shqyrtuar përfshirjen e mundshme të 10 politikanëve në skandalin “Novartis”, të akuzuar për korrupsion, gjatë një takimi të grupit parlamentar SYRIZA , njoftoi zëdhënës i qeverisë, Dhimitris Tzanakopoulos.
Gjatë takimit të planifikuar në orën 11:00 në parlament, kryeministri Cipras pritet të theksojë ecurinë pozitive të ekonomisë greke, suksesin e marrëveshjes 7-vjeçare të detyrimeve, dhe të paraqesë objektivat kryesore të qeverisë.
Sipas burimeve, Cipras pritet të theksojë nevojën për asistimin e të gjithëve për të hedhur dritë mbi çështjen e politikanëve të përfshirë në korrupsion.
Ndërsa, kryetari i parlamentit, Nikos Vucis ka deklaruar se komiteti parlamentar do të ngrihet pas datës 19 shkurt.
