Sipas projektbuxhetit të vitit 2016, pritet një ulje prej 8.1% e punonjësve të administratës publike në krahasim me vitin 2015. Pr/buxheti u dorëzua dje në Kuvend për diskutim nga Ministria e Financave dhe parashikon një shkurtim prej 7200 personash.
Shkurtim më të madh të personelit do të pësojë Ministria e Arsimit dhe Sportit, pas saj Ministria e Brendshme, Ministria e Mjedisit dhe ajo e Zhvillimit Urban. Ndërkohë që, numri i punonjësve do të shtohet në Kryeministri, nga 227 persona që është aktualisht, do të shkojë në 530 nëpunës.
Pas kësaj, shtim të punonjësve do të ketë Ministria e Mbrojtjes, Ministria e Zhvillimit Ekonomik Tregtisë dhe Sipërmarrjes dhe Ministria e Mirëqenies Sociale. Për rrjedhojë, fondet për Ministritë ku do të ketë shkurtime do të pakësohen dhe do të rriten fondet për Kryeministrinë dhe Ministrisë e tjera. Pr/buxheti 2016 parashikon një rritje prej 184% të buxhetit të Kryeministrisë.