Me 200 milionë euro investim direkt nga Qeveria e Kosovës dhe 600 të tjera investim që do t’i bënte KEK-u nga të hyrat e veta, Kosova mund ta rindërtojë termocentralin “Kosova A”
Me 800 milionë euro do të sigurohet një termocentral me kapacitet prej 800 megavatesh që do të ishte në funksion në 30 vjetët e ardhshëm. “Kosova A” e modernizuar do të mbetej pronë shtetërore. Ky është projekt-propozimi i kompanisë gjermane “Babcock Borsig Steinmüller”- Bilfinger, që i është prezantuar Qeverisë në detyrë dhe që do t’i propozohet edhe Qeverisë së re.
Volker Harzbecker, ekspert i shitjes në kompaninë “Bilfinger”, ka thënë se janë në pritje të formimit të Qeverisë së re për t’ia prezantuar këtë projekt, edhe pse të gjitha partive politike u është prezantuar i njëjti.
Ka thënë se ka marrë përgjigje pozitive edhe nga kryeministri në detyrë gjatë takimit, por që asnjëherë nuk ka marrë një vendim nga Qeveria që drejton ai.