Ekonomia shqiptare në tremujorin e parë të këtij viti u rrit me 1.65%.
Sipas të dhënave të publikuara sot nga Instat, kontributin kryesor në rritjen ekonomike e dhanë industria, bujqësia dhe grupi i shërbimeve, ndërsa edhe për këtë tremujor sektori i ndërtimit rezultoi në rënie. Matja e rritjes në tremujorin e parë të këtij viti ka sjellë edhe disa ndryshime metodologjike. Për herë të parë, janë përfshirë në matje edhe sektorët privatë të arsimit dhe shëndetësisë.
Kjo metodologji e re ka sjellë një rivlerësim në rritje edhe në shifrat e vitit të kaluar, ku rritja e ekonomike ka “kërcyer” nga 0.44% në 1.42%. Shifrat e tremujorit të parë janë në linjë me parashikimet e institucioneve të specializuara, për një përmirësim të lehtë të ritmeve të rritjes së ekonomisë shqiptare, të paktën krahasuar me rritjen mesatare të vitit 2013.
Sidoqoftë, mbështetur në revizionimin e rritjes sipas metodologjisë së re, rritja ekonomike në tremujorin I 2014 është më e ulët se rritja prej 2.04% e tremujorit të parë të vitit të kaluar. Në kushtet kur kërkesa e brendshme nuk ka përmirësime domethënëse, besohet se rritja ëhstë mbështetur kryesisht nga eksportet dhe nga sektori publik, përmes shlyerjes së detyrimeve të prapambetura.