Qeveria e Kosovës është e interesuar që Trepçën ta kthejë në këmbët e veta, ngase ajo ka rëndësi të madhe për vendin tonë.
Kështu u tha sot kryeministri Ramush Haradinaj, anëtarëve të Bordit Mbikëqyrës të “Trepça, Sh. A.”, të kryesuar nga Ardian Syla, ku është biseduar për hartimin e statutit të Trepçës, regjistrimin e saj si shoqëri aksionare dhe për zgjedhjen e bordit menaxhues, për të cilat u tha se duhet të përfundojnë shumë shpejt.
Haradinaj inkurajoi anëtarët e ri të Bordit Mbikëqyrës që ta rikthejnë Trepçën në funksion të zhvillimit ekonomik dhe për t’ia rikthyer namin e dikurshëm.
Ai tha se i kupton problemet të cilat i presin bordin e ri, për të cilat duhet angazhim i të gjithëve për zgjidhjen dhe tejkalimin e tyre.
Anëtarët e Bordit Mbikëqyrës të “Trepça, Sh. A.”, u pajtuan që të ketë një bashkëpunim edhe në të ardhmen, ndërsa kryeministri theksoi përkushtimin e Qeverinë mbështetjen e mëtejme për Trepçën.
