Bastisje gjatë natës në Prokurorinë e Durrësit.
Persona ende të paidentifikuar kanë hyrë gjatë natës në zyrën e prokurorëve dhe kanë marrë prej andej materiale të ndryshme.
Nuk ka ende detaje për materialet që kanë mundur të vidhen, ndërkohë që policia ka nisur menjëherë hetimin për zbardhjen e grabitjes dhe identifikimin e autorëve.
Është urdhëruar që të mos hyjë askush brenda pasi prish vendin e provës. Pas kësaj, njoftohet se do të bëhet inventari për të parë se çfarë saktësisht kanë synuar grabitësit.
Ndërkohë po këqyren kamerat e sigurisë dhe po merren shenjat e gishtërinjve për të bërë të mundur identifikimin e autorëve.
Vjedhja është konstatuar nga pastruesja, e cila ka gjetur që në orët e para të mëngjesit kur nisi punën, dyert e dëmtuara të prokurorisë.
Kujtojmë se kjo është herë e dytë në një hark kohor të shkurtër që ndodh diçka e tillë në këtë qytet, pasi pak më parë u vodh posta sekrete e prokurorisë.
Kjo prokurori po heton ngjarje të rëndësishme, kurse ish-drejtuesja e saj është promovuar duke marrë drejtimin e Krimeve të Rënda.