Veliu e Haziri në vizitë zyrtare në Gjermani

Diaspora

Veliu e Haziri në vizitë zyrtare në Gjermani

Më: 28 shkurt 2015 Në ora: 14:08

Kryetari i Agim Veliu, kryetari i Gjilanit Lutfi Haziri dhe drejtori i Arsimit në Podujevë, Nexhmi Rudari po qëndrojnë për vizitë zyrtare në Velbert të Gjermanisë.

Në qytetin Velbert, kryetarët e Podujevës dhe Gjilanit, Veliu dhe Haziri, janë pritur në Parlamentin e Nord Westfalen, ku kanë zhvilluar takim me deputetin e Landit Volker Munchof.

Në këtë takim ishte i pranishëm edhe Astrit Zemaj, konsull në Konsullatën e Republikës së Kosovës në Frankfurt.

eliu falënderoi mikpritësit për pritjen e rezervuar për ta dhe shprehu dashamirësinë e tij për deputetin Volker Munchof, për të cilin tha se është një mik i mirë i Podujevës. Ai po ashtu u shpreh i lumtur që së bashku me të në vizitë po qëndron edhe Lutfi Haziri, për të cilin tha se është politikan me përvojë të madhe .

“Shpresoj se rrugën e bashkëpunimit me qytetin e Velbertit, që ka krijuar Podujeva, do ta ndjek edhe Komuna e Gjilanit”, tha Veliu.

Ndërsa, kryetari i Gjilanit, Lutfi Haziri, tha se ndjehet i nderuar që po viziton Velbertin duke vlerësuar partneritetin në mes Podujevës dhe Velbertit.

“Qytetarët kosovarë janë mirënjohës për gjithë ndihmën që ka dhënë dhe po jep Gjermani për vendin tonë”, tha Haziri.

Podujeva dhe Velberti i Gjermanisë tashmë kanë intensifikuar bashkëpunimin duke realizuar vizita të ndërsjella.

Deputeti i landit, Volker Munchof shprehu gatishmërinë të bëhet edhe një hap më tutje drejt konkretizimit të bashkëpunimit në mes Velbertit dhe Podujevën në shumë lëmi.

“Presim që gjatë vitit 2016 të nënshkruajmë edhe marrëveshje konkrete të këtij bashkëpunimi”, tha Munchof.

Kryetarët, Veliu dhe Haziri, vizituan edhe selinë e CDU, ku u pritën nga shefi i Grupit Parlamentar të CDU në Velbert Manfred Boltz.

Në këtë takim u diskutua për gjendjen politike dhe socio-ekonomike në Kosovë, si dhe për migrimin ilegal.

Të dyja palët u pajtuan se thellimi i bashkëpunimit dhe rritja e përkrahjes nga shteti Gjerman për zhvillimin ekonomik të Republikës se Kosovës, si dhe vazhdimi i përkrahjes në rrugën e anëtarësimit të Kosovës ne Bashkimin Evropian do të ketë impakt direkt në ndaljen e migrimit ilegal.

Sot mund të lexoni Shfletoni kopertinat