Kapen 15 qytetarë të Kosovës klandestinë, 5 prej tyre kishin ndalim hyrjeje në Gjermani

Diaspora

Kapen 15 qytetarë të Kosovës klandestinë, 5 prej tyre kishin ndalim hyrjeje në Gjermani

Më: 20 nëntor 2014 Në ora: 16:54

Zyrtarët policorë në Freilassing (Gjermani) me rastin e kontrollimit të bërë pasditen e të hënës kanë kapur në një vagon treni të udhëtarëve 15 kosovarë që po udhëtonin ilegalisht nga Salzburgu i Austrisë drejt Munihut, Gjermani. Ata treguan dokumentet e identitetit por nuk posedonin viza që u mundësojnë hyrjen në shtetet e BE-së.

Sipas të dhënave të para që ka marrë policia, bëhet fjalë për tri familje nga Kosova dhe tre bashkatdhetarë tjerë të tyre. Ata kanë paguar kontrabanduesit e tyre deri nga 1000 euro për person, për t`i sjellë deri në Austri. Ndërsa nga Austria drejt Gjermanisë ata ishin nisur pa përcjellje të askujt.

Gjatë kontrollimit më të hollësishëm, policët kanë gjetur se njëra familje kosovare me tre fëmijë e kishte të ndaluar hyrjen në Gjermani. Pasi që në vitin 2012 i ishte refuzuar kërkesa për azil, familja qe dëbuar në Kosovë. Tash, siç thotë kryefamiljari 31 vjeçar ata kishin dashur të provonin edhe një herë fatin, shkruan salzburg24.at. Por, edhe kësaj here kishin dështuar. Familja 5 anëtarëshe do t`i dorëzohet autoriteteve austriake

Pos kosovarëve, policia ka kapur edhe tre sirianë klandestinë. Ata, bashkë me 10 kosovarët janë dërguar në qendrën për refugjatë në Munih.

Sot mund të lexoni Shfletoni kopertinat