Mijëra tifozë shqiptarë pritet të jenë në shkallët e stadiumit “Route de Lorient” të Rennes, për të ndjekur nga afër Kombëtaren në miqësoren me Francën.
Pavarësisht se është vetëm një test miqësor pa rëndësi për kualifikimet e “Euro 2016”, tifozët shqiptarë janë organizuar në grupe të ndryshme, kryesisht nga vendet perëndimore ku ata jetojnë.
Ata kanë mbërritur në Rennes për të mbështetur ekipin e De Biasit, por edhe për të protestuar kundër vendimit të Komisionit të Etikës dhe Disiplinës së UEFA-s, që i dha fitoren 3-0 Serbisë.
Mendohet se numri i tifozëve kuqezinj në stadium mund të shkojë deri në 4 mijë. Ata kanë udhëtuar nga Anglia, Belgjika, Gjermania, Austria, Zvicra dhe nga qytete të ndryshme të Francës.