Franca mëton titullin e kampionit të botës. Francezët janë në finalen e madhe, pasi e hoqën qafesh edhe Belgjikën, duke e mundur me rezultat 1:0, në ndeshjen gjysmëfinale. Franca është e bindur se ka ekipin më të mirë dhe se mund ta fitojë titullin e kampionit. Francezët nuk e kishin rrugëtimin e lehtë deri në finalen e madhe sepse patën disa kundërshtarë të fortë. Ata ishin në grupin C dhe me dy fitore e një barazim u kualifikuan.
Në hapje e mundën me 2:1 Australinë, pastaj me 1:0 Perunë dhe u ndanë baras (0:0) me Danimarkën, kësisoj zunë vendin e parë në grup me 7 pikë. Franca dëshmoi fuqinë në takimin e të tetës së finales, kur e mposhtën me rezultat 4:3 Argjentinën e Lionel Messit. Në çerekfinale kishin punë goxha të vështirë për shkak se u ballafaquan me një kombëtare shumë të fortë në repartin e mbrojtjes, siç ishte Uruguai dhe e mundën me 2:0.
Në gjysmëfinale ia dolën (1:0) në përballje me Belgjikën. Përzgjedhësi Didier Deschamps, ka qenë pjesë e Francës në vitin 1998, kur si futbollist (kapiten) fituan titullin e kampionit, pasi që kishin mposhtur në finale me rezultat 3:0 Brazilin. Ai tani synon edhe si trajner ta ngritë trofeun e çmueshëm dhe është optimist i madh. “Është diçka e jashtëzakonshme.
Jam vërtet i lumtur për futbollistët e mi, janë të rinj, por me karakter dhe mentalitet. Ishte e vështirë ndaj Belgjikës, por ky triumf i vogël është i gjithi për ne. Një triumf i forcës së karakterit dhe grupit, sidomos pasi shënoi një mbrojtës”, tha Deschamps. “Kemi punuar shumë në aspektin mbrojtës, ndoshta mund të përfitonim më shumë sa i përket lojës tonë. Por, i ul kapelën lojtarëve dhe stafit tim.
Do të luajmë ne këtë finale. Ndjej shumë krenari, kemi 49 ditë bashkë… Kanë ndodhur shumë gjëra, edhe më të vështira, por është jeta e grupit”, theksoi ai. Deschamps kujton edhe finalen e Euro 2016, kur kishin humbë me 2:0 nga Portugalia. “Finalja e vitit 2016, pra në Europian, ende nuk është kapërcyer, ka qëndruar në kujtesën tonë, në lëkurën tonë, ndaj duam të bëjmë që të harrohet”, thotë Deschamps.