Mesfushorit ofensivë nga Kosova Granit Xhakës aspak nuk i ka pëlqyer deklaratat e sekretarit të përgjithshëm të Federatës së Futbollit të Zvicrës, Alex Miescher. “Zvicra duhet t’i bëjë pyetjen vetes nëse duhet të ndalojë shtetasit e dyfishtë që të përfaqësojnë ekipin kombëtar të futbollit”, kështu ka deklaruar Alex Miescher. Kjo deklaratë e tij ka pasur reagimet të ndryshme, ndër ta edhe Granit Xhaka, anëtar i kombëtares së Zvicrës. Për Zvicrën u paraqitën katër shqiptarë në Kampionatin Botëror, si Xherdan Shaqiri, Valon Behrami, Granit Xhaka e Blerim Xhemaili. “Ne të gjithë jemi zviceranë dhe bëjmë gjithçka për kombëtaren. Secili nga ne jemi mirënjohës për atë që ka bërë Zvicra për ne dhe për familjet tona. Rrënjët e familjes time janë nga Kosova, ashtu siç janë të Breel Embolo nga Kameruni, Manuel Akanji nga Nigeria dhe Ricardo Rodriguez nga Kili e Spanja. Ekipi kombëtar zviceran përbëhet sot gjithsesi nga 50 deri në 60 për qind qytetarë të dyfishtë... Edhe trajneri ynë, Vlladimir Petkoviç, është qytetar me shtetësi të dyfishtë dhe i jep gjak dhe djersë ekipit kombëtar. Me këtë deklaratë Alex ka shkaktuar shumë reagime, por ka lënë edhe shumë të zhgënjyer”, tha mes të tjera Xhaka.
