Prokurori i Përgjithshëm i Shteteve të Bashkuara, Jeff Sessions i është përgjigjur “dhëmb për dhëmb” sulmit të fundit të presidentit Donald Trump ndaj tij, duke këmbëngulur se Departamenti i Drejtësisë që udhëhiqet prej tij nuk do të përkulet përpara presionit politik.
Kundërshtimi i ashpër i Trumpit erdhi pasi shefi i Shtëpisë së Bardhë bëri komente personale ndaj kryeprokurorit amerikan, gjatë një interviste. Trump ka qenë tejet i ashpër në kritikat e tij drejtuar Departamentit të Drejtësisë. Ai ka qenë veçanërisht i irrituar sa i përket menaxhimit të hetimit mbi ndërhyrjen ruse në zgjedhjet e përgjithshme të vitit 2016.
Sessions, dikur mbështetës i fushatës së Trumpit, hoqi dorë nga hetimi në fjalë dhe e la atë në kontrollin e zëvendësit të tij, Rod Rosenstein. Ky vendim, por edhe progresi i mëtejshëm i hetimit nën drejtimin e prokurorit special Robert Mueller, ka sjellë shpërthime të shpeshta nga Trumpi, qoftë personalisht, ashtu dhe përmes rrjetit social “Twitter”.
