Rreth një e pesta e fëmijëve në vendet në zhvillim jetojnë në varfëri të skajshme. Kështu tregon raporti i fundit i publikuar nga Banka Botërore dhe UNICEF-i, që quhet "Ending Extreme Poverty: A Focus on Children”.
Në raport thuhet se rreth 385 milionë fëmijë në rrafsh global jetojnë në varfëri të skajshme.
“Fëmijët janë kategoria më e prekur nga efekti i varfërisë. Ata janë nga më të varfrit në botë, ndërsa fëmijët e moshës më të re janë më të prekurit sepse të ndaluarit nga gjërat elementare ndikon në zhvillimin e tyre trupor dhe mental”, thuhet në deklaratën e drejtorit ekzekutiv të UNICEF-it, Anthony Lake.
Numri më i madh i fëmijëve të cilët jetojnë në varfëri të skajshme gjenden në Afrikën sub-sahariane, mbi 50 përqind, ndërkohë që 36 përqind jetojnë në Azinë Jugore dhe mbi 30 përqind në Indi.
UNICEF-i dhe Banka Botërore u kanë bërë thirrje qeverive, që në planet e tyre kombëtare për reduktimin e varfërisë, të përqendrohen tek fëmijët, si dhe të forcojnë programet që ndihmojnë fëmijët e varfër.
Vlerësimi botëror për fëmijët të cilët jetojnë në varfëri të skajshme është e bazuar në të dhëna nga 89 shtete të cilat përbëjnë 83 përqindëshin e popullsisë së vendeve në zhvillim.
