Izraeli hapi një zyrë misioni në selinë e Natos në Bruksel që synon të forcojë lidhjet me aleancën e drejtuar nga Shtetet e Bashkuara.
Sipas ambasadës izraelite, ambasadori izraelit në Bashkimin Evropian Aharon Leshno-Yaar paraqiti letrat e tij kredenciale të premten tek Sekretari i Përgjithshëm i Natos Jens Stoltenberg.
Misioni diplomatik pritet të shtojë kontributin e Izraelit tek organizata, thuhet në deklaratë.
Të dy zyrtarët diskutuan për një Plan të Përbashkët Veprimi mes Izraelit dhe aleancës, thuhet në deklaratë. Zoti Stoltenberg vlerësoi gjithashtu rritjen e bashkëpunimit mes Izraelit dhe Natos vitet e fundit.
Ambasadori Leshno-Yaar theksoi se “hapja e një zyre të përhershme reflekton rolin e Izraelit në nxitjen e paqes dhe stabilitetit në rajon."
Në qershor, zoti Stoltenberg tha se ishte thelbësore të shtohej bashkëpunimi, meqë Izraeli ka qënë një partner aktiv i aleancës për 20 vjet.
