Dy zv.kryeministra në vend të ish zv.kryeministrit Zoran Stavreski.
Alast mëson nga burimet se Qeveria miratoi në mbrëmje këtë formulë të re përbërjeje në radhët e saj. Zv.kryeministrat e rinj, sipas burimeve, janë Nikolla Todorov dhe Nikolla Popovski. Të dy këta emra njihen si shtylla jo vetëm në radhët e qeverisë; njëri ministër i Shëndetësisë dhe tjetri i Punëve të Jashtme, por edhe në radhët e partisë VMRO DPMNE.
Todorov është një nga njerëzit më të besuar të kryetarit të VMRO-së dhe ish kryeministrit Nikolla Gruevski, si dhe pjesë përbërëse gjatë gjithë kohës në takimet e grupeve të punës mes 4 partive, në bisedimet për zgjidhjen e krizës.
Kjo formulë e re ngre shumë pikëpyetje, nëse bëhet fjalë për fillimin e një formatimi të ri të mundshëm të qeverisë, apo thjesht për forcim të mëtejshëm të figurave të Todorovit dhe Popovskit, duke ditur se në qeveri vota e tyre mbetet ajo që është.
Megjithatë, ministri i ri i Financave Kiril Minovski, kuptohet se nuk pati të njëjtën peshë si Stavreski për të mbajtur pozitën e tij të deridjeshme si zv/kryeministër.
Dy emrat morën pëlqim nga qeveria, në seancën e të cilës sot në mbrëmje sapo u miratua edhe rebalanci i buxhetit.
