Kryetari i Bashkisë se Elbasanit, Qazim Sejdini, propozoi sot në mbledhjen e parë të Këshillit Bashkiak shpalljen “Qytetar Nderi” të sulmuesit Armando Sadiku.
Këshilltarët miratuan në unanimitet që Armando Sadiku të jetë “Qytetar Nderi” i Elbasanit.
Sejdini tha se këtë titull Armando Sadiku e meriton për kontributin në fushën e sportit, por edhe si një nga ambasadorët elbasanas, si një përfaqësues i denjë jo vetëm si futbollist, por edhe i qytetarisë elbasanase.
“Propozoj Armando Sadikun për kontributet e mëdha që ka dhënë, ta shpallim ‘Qytetar Nderi’ të Elbasanit. Si një nga ambasadorët e qytetit të Elbasanit dhe më gjerë në Europë, si një përfaqësues i denjë jo vetëm i futbollit, por edhe i qytetarisë elbasanase. E bëj këtë propozim duke pasur parasysh edhe faktin tjetër që ky djalë i qytetit me korrektësinë, kontributin dhe punën e tij na ka nderuar të gjithëve”, ishte fjala e Sejdinit para këshilltarëve.
Sulmuesi nga Elbasani hyri në historinë e futbollit shqiptar pasi ndaj Rumanisë shënoi golin e parë të kuqezinjve në një Evropian futbolli.
