Izraeli ka pezulluar lejet e hyrjes për dhjetëra-mijëra palestinezë gjatë Muajit të Ramazanit, si pasojë e një sulmi vdekjeprurës në Tel Aviv.
Dy palestinezë kanë hapur zjarr të mërkurën në qendër të këtij qyteti, duke vrarë katër veta.
Sipas policisë, sulmuesit kanë qenë nga fshati Jata i Bregut Perëndimor.
Grupi islamist Hamasi ka lavdëruar sulmin, por nuk e ka marrë përgjegjësinë për të.
Izraeli ka njoftuar sot se 83,000 leje për palestinezët në Bregun Perëndimor, për të vizituar të afërmit e tyre në Izrael gjatë Ramazanit, janë ngrirë.
Autoritetet kanë thënë se lejet janë pezulluar edhe për qindra palestinezë në Rripin e Gazës.
Që nga viti i kaluar ka pasur rritje të dhunës palestineze kundër izraelitëve, përfshirë të shtëna me armë zjarri dhe therje me thika.
Kryeministri izraelit, Benjamin Netanyahu, i cili ka vizituar vendin e sulmit në Tel Aviv, ka thënë se ai është një krim i egër i “vrasjes dhe terrorizmit”.
