Zyrtarët afganë kanë bërë të ditur për ekzekutimin e një gruaje, e cila është akuzuar për tradhti bashkëshortore.
Ngjarja ka ndodhur në një fshat të kontrolluar nga talibanët në provincën perëndimore të Afganistanit, Ghor.
Zëdhënësi i qeverisë provinciale, Abdul Hai Khatibi, ka thënë se ekzekutimi është kryer në fshatin Zanu të qarkut Dolaina, më 5 shkurt.
Gruaja është identifikuar vetëm me emrin Zahra, ndërsa mosha e saj nuk është bërë e ditur.
Khatibi ka thënë se Zahra është ndaluar nga talibanët së bashku me një burrë, i identifikuar si Ayub.
Ky i fundit është qëlluar derisa ka bërë përpjekje të arratiset dhe aktualisht është nën robërinë e talibanëve, ka thënë Khatibi.
Megjithatë, guvernatori i qarkut, Muhammad Hussein Daneshyar, i ka thënë Radios Afganistani i Lirë se gruaja është qëlluar për vdekje nga bashkëshorti i saj, i cili e ka akuzuar për marrëdhënie jashtëmartesore.
Zyrtarët thonë se fshati Zanu është nën kontrollin e militantëve për më shumë se një vit.
Talibanët nuk kanë bërë ndonjë koment.
