Me gjasë dy fëmijë janë vrarë nga sulmet ajrore të Shteteve të Bashkuara në Siri, në muajin nëntor, ka kumtuar mbrëmë vonë ushtria amerikane, duke e pranuar për të parën herë se ka pasur viktima civile, prej se i ka filluar sulmet ajrore kundër militantëve të Shtetit Islamik në Siri dhe Irak, në gusht të vitit të kaluar.
Pentagoni tha se i ka ekzaminuar 46 akuza të ndara për viktima civile, prej të cilave 35 janë treguar jokredibile ose të paverifikueshme. Për akuzat e tjera ende po zhvillohen hetime.
Sipas hetimeve, vrasja e mundshme e fëmijëve ishte kryer kur një aeroplan luftarak amerikan e ka pasur në shënjestër një kapacitet të grupit Khorasan afër qytetit Harim në Siri, ku prodhoheshin materje eksploduese.
“Ne shprehim keqardhje për humbjen e paqëllimshme të jetëve”, tha James Terry, shef i forcës së udhëhequr nga Shtetet e Bashkuara, që lufton kundër militantëve të Shtetit Islamik.
“Koalicioni vazhdon ndërmarrjen e masave të kujdesshme gjatë procesit të marrjes në shënjestër, për t’i zvogëluar rreziqet ndaj joluftëtarëve”, tha gjenerali Terry.
