Ishulli i Statujës së Lirisë, një prej monumenteve më të vizituara të SHBA-së, u evakua sot për shkak të një pakoje të dyshimtë, theksuan mediat lokale në Nju Jork.
“Një pako e dyshimtë ka detyruar forcat e sigurisë të evakuojnë njerëzit përreth Statujës së Lirisë dhe ishullit ku ndodhet ajo në jug të Manhatanit”, siç bëhet e ditur nga Shërbimi i parqeve kombëtare amerikane.
Shërbimi i parqeve kombëtare nuk i ka konfirmuar menjëherë shkaqet e këtij evakuimi.
“Evakuimi i Statujës së Lirisë dhe ishullit në jug të Manhatanit u vendos sepse një qen i policisë kishte ndjerë një erë të dyshimtë pranë rafteve ku vizitorët linin sendet e tyre”, sipas stacionit televiziv NBC.
Statuja vizitohet çdo ditë nga mijëra turistë.