Khadija Ismayilova, gazetarja hulumtuese dhe kontribuese e Radios Evropa e Lirë, është lejuar që të takohet me të afërmit e saj për herë të parë prejse është arrestuar në fillim të muajit dhjetor.
Motra e saj, Sabina Rahimova, ka thënë sot se ajo është takuar me Khadijën, dje në qendrën e paraburgimit në Baku, ndërsa të dyja kanë biseduar përmes një dritare xhami.
Vajza e gazetares gjithashtu ka qenë e pranishme.
Ismayilova është arrestuar më 5 dhjetor ndërsa po mbahet në qendër paraburgimi për nxitjen e vetvrasjes.
Ajo thotë se është arrestuar për t’’iu hakmarrë për raportimet e saj gazetareske.
Arrestimi i saj është dënuar nga grupet ndërkombëtare për të drejtat e njeriut, që shihet si pjesë e një fushate sistematike të autorizuar nga zyrtarët e lartë azer kundër gazetarëve dhe aktivistëve të këtij shteti.
