Franca thotë se presidenti amerikan, Barack Obama, dhe liderët evropianë janë pajtuar se “reagimi i fuqishëm” do të jetë i domosdoshëm, nëse armëpushimi ndërmjet Ukrainës dhe separatistëve prorusë nuk respektohet.
Zyra e presidentit të Francës, Francois Hollande, ka njoftuar mbrëmë se gjatë një video konference, liderët kanë theksuar mbështetjen e tyre për armëpushimin e arritur në Minsk.
“Ata janë pajtuar se reagim i fuqishëm nga komuniteti ndërkombëtar do të jetë i domosdoshëm, në rast se në mënyrë madhore shkilet procesi i Minskut”, thuhet në deklaratën franceze.
Në këtë mbledhje kanë marrë pjesë edhe liderët e Britanisë, Gjermanisë dhe Italisë, dhe presidenti i Këshillit Evropian, Donald Tusk.
Kievi dhe qeveeritë perëndimore e akuzojnë Rusinë për mbështetje të separatisëve në pjesën lindore të Ukrainës, me trupa dhe armatime, përkundër marrëveshjes për armëpushim të arritur më 12 shkurt.
Rusia i ka kundërshtuar këto akuza.