Udhëheqësi i lutjeve të së premtës në Teheran, ka thënë se ‘hapat e fundit’ po ndërmirren në bisedimet me Iranit me gjashtë fuqi botërore me qëllim q ëtë arrihet një marrëveshje për programin bërthamor të Iranit.
Duke iu ligjeruar besimtarëve, Hojatoleslam Kazem Sedighi, e ka lavdëruar Presidentin iranian, Hassan Rohani për mënyrën se si i ka administruar këto bisedime.
Ai ka thënë se Rohani ka pasur qëndrime të ‘qarta dhe premtuese’ në takimet e tij me klerikët kryesir në Qom, një qendër e rëndësishme e autoritetit në Iran.
Mediat iraniane kanë raportuar se Rohani ka udhëtuar drejt Qom-it për të fituar përkrahjen e ajatollahëve kryesor për marrëveshjen për programin bërthamor me Britanin, Gjermaninë, Francën, Rusinë, Kinën dhe SHBA-të.
Sedighi ka thënë se Rohani iu ka treguar klerikëve se Irani nuk do të pranojë ‘turpërimin’, apo mbylljen e objekteve bërthamore apo vazhdimin e sanksioneve.
Analistët thonë se komentet e këtij kleriku janë përgatitje e opinionit për një marrëveshje për programin bërthamor në këmbim të lehtësimit të sanksioneve ekonomike.
Një marrëveshje fillestare duhet të arrihet më së largu deri më 31 mars.