SHBA-ja do të fillojë një afrim historik me Kubën veçanërisht në rivendosjen e marrëdhënieve diplomatike me regjimin komunist dhe lehtësimin e sanksioneve të vendosura që në vitin 1962, deklaroi sot një zyrtar i lartë amerikan.
”Edhe presidenti amerikan, Barack Obama dhe homologu i tij kuban, Raul Castro biseduan sot në telefon për këto çështje”, shtoi ai.
”Biseda e tyre zgjati rreth një orë”, tha zyrtari.
Ndërkohë, burime që përputhen thanë se ish-lideri kuban, Fidel Castro nuk u përfshi në këto bisedime.
”Papa Françesku ka luajtur një rol kyç në afrimin mes dy vendeve”, theksoi zyrtari amerikan.
SHBA dhe Kuba, që ndahen nga Ngushtica e Floridas, 150 kilometra e gjerë, nuk kanë marrëdhënie diplomatike që nga viti 1961.
Obama i ka kërkuar sekretarit të Shtetit, John Kerry të fillojë menjëherë bisedimet për rivendosjen e marrëdhënieve diplomatike mes dy vendeve.
SHBA njoftoi hapjen e një ambasade në Havanë ”gjatë muajve të ardhshëm”.
