Kompanitë më të mëdha gjermane do të duhet të kenë të paktën 30% gra në bordet e tyre drejtuese dhe mbikëqyrëse nga viti 2016. Kjo është një direktivë e re ligjore që qeveria gjermane miratoi të martën në mbrëmje.
Sipas "Associated Press", krerët e Social Demokratëve të Gjermanisë dhe blloku konservator i Angela Merkelit ranë dakord për miratimin e ligjit të ri gjatë një takimi të martën vonë. Projektligji do të hidhet për votim më 11 dhjetor.
Aktualisht, në Gjermani gratë zënë vetëm 22% të pozitave jo ekzekutive në bordet e kompanive të listuara nga Ministria e Ekonomisë. Në bordet e menaxhimit ato mbajnë vetëm 6% të posteve.
Plani i ri do të përfshijë 100 kompani të mëdha që do t’u duhet ta zbatojnë këtë normë nga viti 2016. Ligji parashikon që kompanitë që nuk e plotësojnë kuotën nuk do të lejohen t’i plotësojnë vendet vakante me meshkuj.
Futja e kuotave për gratë ishte një nga kushtet e partisë së majtë Social Demokrate për të hyrë në koalicion me konservatorët e drejtuar nga kancelarja Merkel.
Gjermania ka mbetur shumë prapa vendeve të tjera evropiane në aspektin e përfaqësimit të grave në bordet drejtuese të kompanive. Norvegjia, Spanja, Islanda dhe Franca kanë ndërmarrë gjithashtu nisma të ngjashme, megjithëse janë shumë më mirë se Gjermania.
