Irani dhe gjashtë fuqitë botërore kanë arritur pajtueshmëri për zgjatjen e bisedimeve për programin atomik iranian deri më 1 korrik 2015, pas dështimit që të arrijnë marrëveshje brenda afatit, që kalon sonte në mesnatë.
Kjo është hera e dytë që kanë vazhduar negociatat për arritjen e marrëveshjes, me të cilën do të përfundoj mospajtimi 12 vjeçar ndërmjet palëve.
Me marrëveshje synohet ndalja e programit atomik iranian, për të cilin shtetet perëndimore kanë shqetësime se mund të çoj në zhvillimin e armatimit bërthamor. Në anën tjetër do të tërhiqeshin sanksionet, të cilat e kanë dëmtuar ekonominë e Iranit.
Pas takimeve të furishme të minutës së fundit në Vjenë, sekretari i jashtëm britanik, Philip Hammond, tha sot se Irani dhe fuqitë botërore kanë bërë “njëfarë progresi të rëndësishëm”, në rundin e fundit të bisedimeve, që filluan më 18 të këtij muaji.
Ai theksoi se negociatorët tash synojnë arritjen e “marrëveshjes kryesore” deri më 1 mars, ndërsa bisedimet do të vazhdojnë në dhjetor.
Sekretari amerikan i shtetit, John Kerry, tha se fuqitë borëtore nuk do të bisedojnë përgjithmonë me Teheranin, pa progres serioz, por tash nuk ishte koha që të largohen pa pajtueshmëri për vazhdim të negociatave.
