Shtetet e Bashkuara kanë mirëpritur marrëveshjen e nënshkruar në Afganistan, për ndarje të pushtetit midis dy kandidatëve presidencialë.
Sipas marrëveshjes së nënshkruar sot, Ashraf Ghani do të emërohet president, ndërsa Abdullah Abdullah shef ekzekutiv.
Marrëveshja i jep fund kontestimit disamujor të rezultatit të zgjedhjeve të qershorit.
“Nënshkrimi i kësaj marrëveshjeje ndihmon në mbylljen e krizës politike në Afganistan dhe rikthen besimin në rrugën përpara. Ne e mbështesim këtë marrëveshje dhe jemi të gatshëm për të punuar me administratën e ardhshme për të siguruar suksesin e saj”, ka thënë zëdhënësi i Shtëpisë së Bardhë, Josh Earnest.