SHBA: Hetime të FBI-së për sulmet e hakerëve rusë

Bota

SHBA: Hetime të FBI-së për sulmet e hakerëve rusë

Më: 28 gusht 2014 Në ora: 20:24

Mediat perëndimore raportojnë se agjencia FBI po zhvillon hetime për sulmet aktuale nga hakerët rusë kundër sistemit financiar të Shteteve të Bashkuara, që shihen si hakmarrje për sanksionet e qeverisë amerikane kundër Rusisë.

Në raporte citohen burime që thonë se hakerët rusë e kishin marrë në shënjestër bankën JPMorgan Chase dhe së paku një bankë tjetër amerikane.

Bloomberg.com raporton se sulmi ka çuar në humbje të të dhënave të ndjeshme.

Në këtë raport është cituar një ekspert i sigurisë, i cili ka thënë se sulmi duket “larg nga kapaciteti i hakerëve të zakonshëm kriminalë”.

New York Times ka raportuar se JPMorgan Chase dhe se paku katër firma të tjera, ishin goditur gjatë muajit gusht nga ato që ishin përshkruar si “sulme të koordinuara”, që kanë tërhequr sasi të mëdha të të dhënave, përfshirë informacione për xhirollogaritë e kursimeve.

Sot mund të lexoni Shfletoni kopertinat