Ministria e brendshme e Ukrainës i ka filluar hetimet kundër liderit të Partisë Komuniste të Rusisë, Gennady Zyuganov, dhe politikanit ultranacionalist rus, Vladimir Zhirinovsky.
Zoryan Shkiryak, këshilltar në Ministrinë e brendshme të Ukrainës, tha sot se politikanët rusë janë të dyshuar për “financim të aktiviteteve që synojnë ndryshimin e territorit të Ukrainës dhe të kufijve të saj shtetëror”.
Më herët, ministri i brendshëm i Ukrainës, Arsen Avakov, kishte shpallur hetime kundër ministrit të mbrojtjes së Rusisë, Sergei Shoigu, dhe biznesmenit rus, Konstatin Malofeyev, të dyshuar për organizim të armatimit ilegal të formacioneve ushtarake në territorin e Ukrainës.
Nga ana tjetër, autoritetet e Rusisë, në fillim të këtij muaji, kanë shpallur se i kanë filluar hetimet kundër ministrit ukrainas, Arsen Avakov, dhe guvernatorit të rajonit Dnipropetrovs në Ukrainë, Ihor Kolomyskiy, për dyshime se kanë zhvilluar operacione ilegale ushtarake, rrëmbime dhe pengime të gazetarëve.