Ministri i Jashtëm i Ukrainës, Andriy Deshchytsya, ka thënë se kampi i Euromaidanit në Kiev nuk do të shpërbëhet.
Ukraina, Rusia, Shtetet e Bashkuara dhe Bashkimi Evropian kanë arritur një marrëveshje në Gjenevë këtë javë, sipas së cilës, “të gjitha rrugët, sheshet dhe vendet e tjera publike në qytetet e Ukrainës, të pushtuara ilegalisht, duhet të zbrazen”.
Duke folur për BBC-në, Deshchytsya ka thënë se aktivistët pro-evropianë në Sheshin e Pavarësisë në Kiev kanë kërkuar leje nga këshilli i qytetit, “andaj edhe kampi i tyre nuk është pushtim ilegal”.
Separatistët pro-rusë kanë uzurpuar ndërtesat qeveritare në disa qytete në lindje të Ukrainës.
Ata kanë thënë se do t’i lirojnë ato vetëm nëse aktivistët e Euromaidanit largohen të parët nga Sheshi i Pavarësisë në Kiev.