Pakistani thotë se ka mbyllur pikat e kalimit kufitar dhe ka vendosur trupa shtesë për të ndihmuar Afganistanin për zhvillimin e zgjedhjeve paqësore. Ushtria pakistaneze tha mbrëmë se të gjitha pikat e kalimit kufitar do të qëndrojnë të mbyllura deri në mbylljen e qendrave të votimit në fund të zgjedhjeve të sotme. Po sipas ushtrisë, janë marrë masa mes dy ushtrive për të forcuar situatën e sigurisë.
Ushtria pakistaneze thotë se po patrullon zonën kufitare të vendit dhe se kontrollet e imigracionit janë shtuar. Sipas burimeve zyrtare, të gjitha rrugët drejt kufirit afgan po kontrollohen rreptësisht nga toka dhe ajri për të parandaluar lëvizje drejt zonës kufitare.
Masat e reja të sigurisë janë ndërmarrë pas akuzave nga pala afgane se agjencia pakistaneze e zbulimit është pas sulmeve të fundit kundër zyrtarëve dhe objekteve zgjedhore në Afganistan në prag të votimeve për president. Pakistani i ka hedhur poshtë këto akuza si të pabaza.
Këshilltari pakistanez për politikën e jashtme dhe sigurinë kombëtare Sartaj Aziz tha se vendi i tij është i interesuar që të ketë stabilitet në Afganistan:
"Mendoj se perceptimi që Pakistani do të minojë zgjedhjet mund të jetë taktikë e disa partive në Afganistan, por nuk është i bazuar në fakte apo nuk tregon motive reale që mund të ketë Pakistani për veprime të tilla”.
Zoti Aziz ritheksoi se Islamabadi dëshiron marrëdhënie miqësore me Kabulin dhe shpreson se Afganistani do të dalë më i fortë dhe më i bashkuar pas zgjedhjeve:
"Ne do të respektojmë vullnetin e votuesve dhe do të punojmë me qeverinë që zgjedhim. Ne nuk kemi preferenca dhe nuk duam të ndërhyjmë në ndonjë mënyrë".
Talebani është betuar të përdorë të gjitha mënyrat për t’i penguar votimet. Zoti Azizi thotë se shpreson që megjithë kërcënimet, një numër rekord afganësh do të votojnë për të garantuar një tranzicion paqësor demokratik.
Pakistani ka mbrojtje dhe kontroll shumë të dobët dhe joefektiv në kufirin me Afganistanin që shtrihet për 2 mijë e 500 km. Komandantë afganë dhe amerikanë kanë thënë prej kohësh që ekstremistët e Talibanit strehohen në Pakistan, nga ku organizojnë sulmet e tyre kundër forcave lokale dhe ndërkombëtare në Afganistan.
