Shpëtim Shala, boksieri pejan, që jeton dhe vepron në Austri, ka zhvilluar një ndeshje fenomenale në parameç të duelit të Haxhi Krasniqit i cili fitoi titullin Evropian. Shala ka dominuar qysh nga fillimi i duelit me çka edhe e nokautoi kundërshtarin e tij Gabor Detren në ruandin e dytë të meçit. Trajneri i tij, Enes Osmanoviç tani po shpreson se boksierit të tij do ti mundësohet ndeshja për titull. “Shala ka treguar edhe një herë se është një boksier mjaft i fuqishëm dhe kjo u tregua me dominimin që pati ndaj kundërshtarit të tij. Tani të them drejtën duke e parë edhe statistikën në Boxrec, Shala ka pikë të mjaftueshme për tu ndeshur për titull dhe unë besoj se do ti jepet shansi edhe atë në ndeshjen e radhës. Ky meç pritet të jetë në Gjermani”, zbulon për “ArenaRing”, Osmanoviç.
