Conor McGregor e Floyd Mayweather janë në bisedime për një rimeç me vlerë 500 milion dollarë.
McGregor e Mayweather, të cilët u ndeshën në duel boksi në gusht të vitit të kaluar, janë në bisediem për një ndeshje rimeçi, kësaj radhe në MMA, sipas talkSPORT.
Në duelin e zhvilluar në Las Vegas gusht të vitit të kaluar, McGregor u mposht në ring nga Mayweather në rundin e 10-të, derisa kësaj radhe meçi mund të zhvillohet në arenën e preferuar të McGregorit.
Vlera e një rimeçi të mundshëm në mes të Conor McGregor e Floyd Mayweather, do të kapte shifrën marramendëse të 500 milionë dollarëve [360 milionë funte].
Mayweather “heshti” McGregorin në duelin e boksit të zhvilluar më 26 gusht
Sipas Jim White të talkSPORT, dyshja janë në diskutim e sipër rreth një rimeçi potencial në MMA [arte marciale të përziera], dhe beson se dueli do të ndodhë.
Mayweather ka lënë të kuptohet se mund të jetë i gatshëm të bëjë debutimin e tij në tetëkëndësh, kur postoi një video të tij duke u futur në kafazin e MMA muajin e kaluar.
Ndërkaq, komentatori i MMA Joe Rogan ka pohuar se Mayweather tashmë është në bisedime me presidentin e UFC, Dana White, rreth një marrëveshje të mundshme ‘miliarda dollarëshe’ për një duel.