Përfaqësuesja e Kosovës në basketboll këtë javë do t’i zhvillojë dy ndeshjet kualifikuese për Kupën e Botës “Kina 2019”.
Të enjten dhe të dielën nga ora 20:30, përfaqësuesja e Kosovës do të përballet me Hungarinë dhe Poloninë.
“Prandaj ju presim të gjithëve në sallën e Pallatit të Rinisë dhe Sporteve në Prishtinë. Zani yt, na duhet në sallë!”, thuhet në njoftimin e Federatës së Basketbollit të Kosovës.
Pas ngjarjes tragjike që ka ndodhur mëngjesin e së shtunës, ku e ka humbur jetën basketbollisti i përfaqësueses së Kosovës, Gazmend Sinani dhe janë lënduar tre basketbollistë të tjerë, Fisnik e Granit Rugova, Altin Morina dhe fizioterapeuti, Kujtim Shala, Federata e Basketbollit të Kosovës (FBK) kishte bërë kërkesë në FIBA për moszhvillimin e këtyre dy ndeshjeve, por kjo e fundit sot e ka informuar FBK-në se ndeshjet duhet të zhvillohen.
Ndeshjet që do të zhvillohen të enjten dhe të dielën, do t’i kushtohen basketbollistit të përfaqësues së Kosovës, Gazmend Sinani, i cili humbi jetën në aksidentin e trafikut në Gjakovë.
“#PERTYGAZ15″, thuhet në postimin e Federatës së Basketbollit të Kosovës.
Numri 15 i fanelës, të cilin e ka mbajtur Gazmend Sinani është pensionuar për nder të tij dhe më nuk do ta mbajë askush.