Federata e Basketbollit të Kosovës kësaj radhe ia ka besuar klubit të Basketbollit të Rahovecit, organizimin e Final 8, i cili për herë të parë do të organizohet në një format ndryshe.,
Bordi i FBK-së së fundi kishte marr vendim që Final 8 i Kupës së Kosovës për vitin 2019 të organizohet në Rahovecë nga klubi i basketbollit Rahoveci.
Në konkursin e hapur nga FBK prej 28 dhjetor 2018 deri më 9 janar 2019 për organizimin e Final 8 të Kupës së Kosovës, kishte konkurruar KB Rahoveci, duke i plotësuar të gjitha kushtet në bazë të konkursit dhe Udhëzuesit për organizimin e Final 8 të Kupës së Kosovës.
Duhet theksuar se me këtë rast KB Rahoveci do të bëjë përurimin e palestrës së re “Mizair Isma”, në të cilën kanë filluar punimet para dhjetë viteve.
Kryetari i klubit të Rahovecit u shpreh i lumtur që atyre iu është dhënë një mundësi e organizimit të një eventit si ky dhe pohoi se në Rahovec nga data 17 shkurt deri me 3 mars do të ketë spektkakël.
“I ftojmë të gjithë akterët që janë të kyçur në punët e palestrës që të bëjnë punën e tyre, që ne të jemi gati për ta organizuar një spektakël i cili do të mbahet në mend”.
“E falënderoj FBK-në për mbështetjen, i falënderoj anëtarët e klubit KB Rahoveci për punën e madhe pasi e kemi filluar nga zero dhe ja ku jemi. I falënderojmë donatorët edhe ata potencial që do të jenë për Kupë”, ka thënë Bekim Hoxha, kryetari i klubit të Rahovecit.
Në anën tjetër edhe sekretarja e përgjithshme Elvira Dushku, e uroj klubin e Rahovecit për punën e bërë në këto vite, ndërsa u shpreh e bindur që gara do të mbahet në këtë qytet.
Final 8 i Kupës së Kosovës do të zhvillohet prej 27 shkurt deri më 3 mars.
Më 27 dhe 28 shkurt do të luhen ndeshjet çerekfinale, si dhe gjysmëfinalet në konurrencën e femrave, kurse më 1 mars ato gjysmëfinale te meshkujt, derisa finalet në të dyja konkurrencat do të zhvillohen më 3 mars.
Fituese të Kupës së Kosovës për edicionin e kaluar janë Z Mobile Prishtina te meshkujt dhe Prishtina te femrat.